ماسج؟؟!!!

جاحة غريبة والله
عادي جدا.. مسكت الموبايل و كتبتله ماسج ...عادي خالص.. قلتله "هاي ازيك و أخبارك يا باشا؟؟ دا إنت واحشنا و الله.. ينعل أبو الزعل يا عم"..
بعتها بروح متسامحة تماما .. ايه التسامح ده؟؟ مشاعري طالعة بيضاااااا .. كإنه واحد زميلي ف الكلية كنا متخانقين على ندالة عبيطة من ندالة الصحاب وراحت لحالها... وطلعت أنا الكبيرة
بس ده مكانش زميلي... ده كان حبيبي اللي شايفة المستقبل اللي جاي بيه.. كان الحد اللي حسسني اني بنوته بتحب.. كان الامان بالنسبة لي و كإنه بيتي... أو أبويا.. أو ولي أمري..
وما كانتش خناقة عبيطة ... ماكانتش خناقة أساسا.. ده سابني.. كده ببساطة.. قالهم قلولها آسف مش هاكمل معاها اللي حلمناه.. مش هافضل في حياتها اللي دخلتها و مليتها من أولها لآخرها بكل تملّك .. آسف مش هاوفي بأي وعد من الوعود اللي صعب بنت تقابلها مرتين في حياتها.. واذا قابلتها مش هاتصدقها غير مرة ..و مش هاتملى عقلها و قلبها وامنياتها غير مرة

***********************
ايه السعادة اللي أنا فيها ده بعد ما بعت الماسج؟؟؟

عادي كده؟؟.. سعيده على ايه ؟!!!!
على سنتين اتإلمت فيهم ألم كان ها يجيبلي جنان؟؟.. على سنتين سابني فيهم أخبط دماغي في الحيطة؟؟
و قُلت عليّ و على أعدائي و هاعمل وأسوي

سعيد على مشاعر الحب النضيفة البريئة اللي فضلت محوشاها بعيد عن أي عك بيحصل و قررت اديهاله عشان يبقى أول و آخر حد أعيش معاه بحبي و كل اللي عندي.. وبعدين اترمى ده كله على الأرض..و ببساطة كده بقيت فاضية و باعيعة الحب و اللي عاوزينه؟؟ هي دِه حاجة تسعد؟؟
طب أنا عملت ايه في الآخر؟؟... بعتله ماسج أقوله هاي ياباشا؟؟؟ باشا؟؟؟
و الله مستغربة طحن... ومستغربة من احساسي بانه واحشني جدا وبجد...
ده أنا امبارح كنت نايمة و السرير غرقان عياط.. كان امبارح ده !! عياط منه و عليه و على نفسي..
أصله كان طول الوقت محسسني انه ابني الصغير .. راجل آه و مسئولة منه بس في الازمات بييجي يعيطلي .. ودلوقت كان بييجي عاوز يعيطلي.. بس كنت بكشر في وشه.. أصل ايه البجاحة ده؟؟
سايبني و وواجعلي قلبي ومبوظلي الحياه حوليّ و بعدين ييجي عاوز يعيطلي من الدنيا و من بعدنا؟؟
طب أنا بعيط من بعد حبيبي عني.. هو لسة حبيبي
ازاي بقى أعرف أقتنع لما يقوللّي اني صاحبته اللي عاشرها تلات سنين قبل ما نرتبط؟؟ .. عاوزني أرجع تلات سنين ورى ازاي؟؟ طب هو رجع بسهولة عشان اللي جه بعدهم ماكانش بالنسبة له حب.. لكن أنا في سد كبييير بيني و بين التلات سنين دول اسمه (( حبيبي))
في ذكريات تهد جبل..

ماشي.. أنا بالنسبة له صاحبته.. بس هو مش صاحبي
يروح بقى يشوف حد يعيطله.. يعيط على حاله و عليّّ و انشالله يعيط على خلق ربنا كلهم بس بعيد عني
بس أنا لسان على الفاضي ..ما قدرتش أبعده عني.. كتبتله ماسج... زمانه فهم اني بقوله أهلا بيك .. صحاب صحاب ماشي كلامك..
ماهو مش عارفة أرمي مسئوليته اللي كنت شايلاها .. وهو اللي ملاني بيها وهو اللي سحبها و دلوقت عايزها بس بصحوبية عشان هو بيرتاحلي .. بيحبني .. و أنا بحبه .. بس حب عن حب يفرق.. بس خلاص .. ماشي كلامه

قولوا يارب بس الشعرة اللي عندي اللي ملياني تسامح و رضى بالامر الواقع ماتروحش و ترجع شعرة الثور الهايج اللي كان مش شايف قدامه من غضبه.. أصله غلابان و الله و أنا اللي عارفاه و عارفة اللي فيه.. وعارفاه لما يحب حد.. ولما يحب حب مالهوش علاقة بأي حاجة و لا له منطق.. عارفاه لما يحس بحد انه منه.. وعارفة حزنه و عارفة الدنيا عاملة فيه ايه.. فخلاص بقى.. مش آخر الدنيا انه سابني.. مسابش بنت حسني مبارك يعني .. كده كده سابني و كده كده أنا مجروحة.. يبقى أصلح اللي عنده و أنا ربنا يسهلها معاي بقى..

والله أنا عاوزة أضحك
طب تخيلوا بقى مايردش و يحسسني ان العملة الفظيعة اللي عملتها في نفسي دلوقت اترمت على الارض... يا سلااااام .. هاتبقى هدية من الآخر و تكرار لمسلسل جروح غبي مش لاقياله آخر.. يلاّ بقى حصل خير
بس سنتين عذاب اتكنسلوا بماسج؟؟؟ يا نهار أبيض.. ماسج؟؟!!! حاجة غريبة ده و الله